Увесці адказнасць за «абсалютна непраўдзівыя» скаргі, апублікаваныя ў сацсетках, прапанавала старшыня Савета Рэспублікі Нацыянальнага сходу Наталля Качанава ў эфіры дзяржтэлеканала «Першы інфармацыйны».
Палітык адзначыла, што сёння ў людзей мусіць быць адказнасць, калі яны ўкідваюць нейкую праблему ў публічную прастору праз сацыяльныя сеткі. На думку Наталлі Качанавай, любая апублікаваная інфармацыя мусіць быць «абсалютна праўдзівай», паведамляе «Першы інфармацыйны».
— Калі пачынаюць разбірацца больш глыбока і дэталёва ў тым, пра што заяўляюць нашыя грамадзяне, выкідваючы інфармацыю ў TikTok ці ў нейкі іншы інфармацыйны канал, то часцяком гэта абсалютна непраўдзівая інфармацыя. І тут мне бачыцца, што ўсё ж мусіць быць нейкая адказнасць за тое, што ты даносіш і пускаеш у публічную прастору, — лічыць старшыня Савета Рэспублікі Нацыянальнага сходу Беларусі.
Яна дадала, што некаторыя карыстальнікі сацсетак публікуюць недакладную інфармацыю выключна «для таго, каб проста хайпануць». Такія скаргі забіраюць час у людзей і структур, якім даручаюць вырашыць няісныя праблемы.
— Мы мусім уважліва адсочваць, мы мусім уважліва вывучаць гэта ўсё. А ў выніку прымаць рашэнні, якія, магчыма, знойдуць сваё адлюстраванне ў законе. І потым, вы ведаеце, гэта ж імідж улады, — падсумавала Наталля Качанава.